07.02.2023
Həmkarlarımız da yardıma qoşulub
Türkiyədə baş verən zəlzələdə zərərçəkənlərə kömək məqsədilə Babək prospektinə, qardaş ölkə üçün yardımların toplandığı ünvana gedənləri qardaşlıq duyğusu birləşdirib.
Bu həmrəyliyin gücünü sonuncu dəfə biz Vətən müharibəsində yumruq kimi birləşəndə görmüşdük, dünyaya da göstərmişdik. Bu günlərdə isə Türkiyədə dağıntılar altında qalan körpələrin, soyuq-şaxtalı qış günlərində isti ocaqlarından olan ailələrin köməyinə çatmağa can atırıq hamılıqla.
Əsl Çanakkala ruhu var Bakıda. Yardım kampaniyasına polis əməkdaşları da qoşulub. Yardımların toplandığı ərazidə Bakı şəhər BPİ DYPİ-nin, Xətai RPİ-nin əməkdaşları həm ictimai və yol hərəkəti təhlükəsizliyini qoruyub, həm də zəlzələdən zərərçəkənlərə ehtiyac duyulan zəruri əşyalar gətiriblər.
Əlahiddə Çevik Polis Alayının 5-ci Patrul Bölüyünün əməkdaşları da təbii fəlakətlə üzləşənlərə kömək məqsədilə keçirilən kampaniyaya könüllü qoşulublar. Həmkarlarımız qış paltarları, o cümlədən yataq, yorğan, döşək, təmizlik alətləri toplayaraq qablaşdırıb, yardımların toplandığı ünvana çatdırıblar.