Rəsmi

09.08.2022

Polislər V İslam Həmrəyliyi Oyunlarında yarışacaq

Avqustun 9-da Konya şəhərində V İslam Həmrəyliyi Oyunları start götürüb. Qeyd edək ki, V İslam Həmrəyliyi Oyunlarında 56 ölkədən 4 min 200 idmançı yarışacaq. Avqustun 18-dək davam edəcək yarışda Azərbaycanın idman şərəfini ümumilikdə 281 idmançı qoruyacaq.

Bu oyunlara DİN-in İdman Cəmiyyətinin 4-ü polis olmaqla 12 yetirməsi də qatılıb. Stend atıcılığı üzrə Riqina Meftahətdinova, yunan-Roma güləşi üzrə Dadaş Dadaşbəyli, Cüdo idman növü üzrə Məmmədəli Mehdiyev, Kikboks idman növü üzrə Surət Qarayev mübarizə aparacaq.

Xatırladaq ki, ilk dəfə bu oyunlar 2005-ci il aprelin 8-dən 20-dək Səudiyyə Ərəbistanında keçirilib. İkinci İslam Həmrəyliyi Oyunları 2009-cu ilin oktyabrında İranda keçirilməsi planlaşdırılsa da bu tarix sonradan 2010-cu ilin aprel ayına dəyişdirilib. Lakin müəyyən fikir ayrılığı səbəbindən ləğv edilib. 3-cü İslamiada oyunları 2013-cü ildə İndoneziyada, dördüncü dəfə isə 2017-ci ildə Bakıda keçirilib. Beşinci İslam Həmrəyliyi Oyunları 2021-ci ilin sentyabrında keçirilməli idi. Pandemiya ilə əlaqədar yarışa hazırlığın tam aparılması üçün oyunların 2022-ci ilə təxirə salınması məqsədəuyğun hesab olunmuşdu.

Yarış ərəfəsində idmançılarla görüşən prezident İlham Əliyev onlara bu fikirlərlə dəstək olub: “Əminəm ki, hər zaman olduğu kimi, Azərbaycanın idman bayrağı, idman şöhrətimiz yüksəklərdə olacaq və siz Vətənə qələbələr, müvəffəqiyyətlər, uğurlarla qayıdacaqsınız”.
“Polis”in kollektivi olaraq idmançılarımıza uğurlar arzulayırıq.

Ruhiyyə Əliyeva,
polis kapitanı